驚死....去做了身體檢查

早排睇雜誌，見到個醫生訪問，先知家族有人患過乳癌或子宮頸癌，自己患呢類癌嘅機會都會高d。我阿媽同姑姐都患過呢類Cancer，屬於高危人仕，諗諗吓都係做婦科檢查穩陣d。

我係forum睇到，有人推介去weHealth（眾健醫學診斷及內窺鏡中心），話果度多驗身plan選擇，醫護人員夠專業外。我都上網search過, 原來果度有個女性專用區，唔會有男人出現, 唔使怕尷尬。

第二日，我打電話去weHealth，同佢講我家族遺傳問題。姑娘聽完我嘅情況，提議我見一見醫生先，book左星期六做檢查。

檢查果日，我準時兩點到，姑娘叫Kitty，佢遞份form畀我，叫我填咗個人資料先。然後就帶我入房見醫生，我同醫生講阿媽之前有乳癌，但已經康復。醫生話如果係一般人(好似我咁後生果D)只提議照乳房超聲波。係因為家人有呢類病，風險較高，最好做埋乳房X光，保障多d。佢仲話因為一般40歲以下，都唔建議照乳房X光，乳腺比較敏感。

最後我選擇做一個全面既婦科檢查，包括乳房超聲波同乳房X光造影仲有超薄細胞塗片檢查。

之後姑娘帶我做體格檢查，同我量血壓脈搏，度高磅重，測視力，同埋計BMI。我話自己有D肥，但係Kitty話我身型Fit，根本唔駛減磅….A0A呵呵呵。

做完體格檢查後，佢就同我做健康調查問卷。問下我有冇藥物敏感，同其他病症。同Kitty傾完一陣，佢就帶我去做心電圖（嗱，呢部儀器就係用嚟做心電圖檢查）

大概十幾分鐘就搞掂，Kitty話遲d醫生會同我講解個報告，睇吓心跳，心臟健康正唔正常，有冇需要再做深入d嘅檢查。

之後佢帶我上女性專用區，服務好貼身，裡面有梳化，電視，雜誌同埋咖啡機，可以畀我哋做檢查前後休息吓…

我係更衣室換衫果陣，原來專用區出面度玻璃門仲會上鎖，好穩陣，唔會有男人行到入嚟！！

之後就係做最最最最尷尬既---超薄細胞塗片檢查。要瞓上張床度，張開兩腿，將兩隻腳放喺兩個腳踏度，我喺咁將兩隻腿夾埋，真係好緊張，之後……相信好多JM都做過啦…唔講咁多啦 

到最後要做乳房超聲波同X光造影檢查，Kitty帶我去女性專用區，我仲以為唔通又要換第二套袍做檢查。原來個乳房X光造影檢查房就係更衣室隔離。

女X光師已經喺房入面，個房仲開咗暖爐0.O，
醫生同我講，要有心理準備，檢查過程比較痛，因為要分別將兩邊整個乳房放喺個儀器嘅黑板上面，佢哋會控制塊透明膠板壓向乳房上面。個乳房愈壓得扁，個X光檢查結果就愈清晰！！！=_____=

雖然忍住痛，但我都忍唔住嗌咗出嚟,因為真係好痛呀!!!!!!!十分鐘後，終於大功告成，照咗四張X光片。X光師話X光嘅優點係照乳房組織嘅鈣化點，早期乳癌會有鈣化點出現，所以對確診乳癌準確度好高。乳房超聲波就以照水瘤同乳腺增生比較好，加上冇輻射。

Kitty見我照完X光，就帶我去隔離房做乳房超聲波檢查。

X光師喺我乳房上面塗咗好多Gel，跟住攞住個超聲波儀器，喺我乳房上面掃來掃去。我見到電腦螢幕上面，出現自己個乳房造影，黑漆漆，唔知咩嘢嚟。大概十五分鐘就照完超聲波嘞。

話咁快，唔駛一個鐘，已經做晒成個婦科檢查，Kitty同我個三個工作天後，就會有報告，到時前一日會有姑娘打電話畀我，叫我上中心見醫生睇報告。

臨走時，佢同我講，話我喺中心做咗身體檢查，就會成為中心嘅weClub會員。我問有咩著數，佢話我知可以免費洗牙同檢查牙齒，另外仲有現金優惠券一百蚊，但要下次檢查先用得！

前兩日，返中心睇咗報告，好彩一切正常，身體冇咩問題，不過醫生同我講，因為阿媽曾經有過乳癌，所以我每年要照乳房超聲波，隔兩年就照乳房X光，保障d........抹片檢查都要年年做。